Euskadi Quadballek hilabete honetan ospatuko den Urduliz Link Upekin, teknologia eta gaming-aren jaialdi handiarekin, egin du bat. Ekainaren 20 eta 21ean bertaratzen zareten guztiok gure standetik pasatzeko aukera izango duzue quadballari buruz galdetzeko, baita kirola probatzeko ere.

Quadballa errugbia, eskubaloia eta brilea konbinatzen dituen kirol misto eta inklusiboa da. Euskadi Quadballek informazio postu bat eramango du Lan Partyra eta kirola ezagutzeko jarduera ezberdinak antolatuko ditu.

Hastapenerako doako txapelketa

Urduliz Link Upen quadballaren inguaren informatzeaz gain lanparty honetarako esklusiboki sortutako doako txapelketa batean parte hartzeko aukera izango duzue ere. Formulario hau betetzen duzuen guztiok zuen lehen lehiaketa jokatu ahal izango duzue, kirola probatu eta bere xarma zuzenean ezagutu ahal izateko.

Txapelketa honetarako talde mistoak sortuko ditugu zoriz parte-hartzaile guztiekin. Taldeek partidu azkar batzuk jokatuko dituzte quadballaren inguruan ikasi eta benetako lehiaketa baten esperientzia bizitzeko. Txapelketa hau ezin hobea da quadballean jokatzeko irrikitan zaudetenontzat eta lotsak eta beldurrak kendu nahi dituzuen guztiontzat.

Quadball eta bideojokoak?

Ziuraski ez zenekiten, baina badira jada gure kirolean oinarritutako hainbat joko. Eta ez, ez gara Quidditch Champions edo Harry Potter: Quidditch World Cup jokoei buruz ari. Quadballaren elkarte barruan sortu diren jokoei buruz ari gara, IQAren arautegi ofiziala jarraituz.

Courtyard Broomball

Izen bitxia, ezta? Courtyard Broomball 2018an sortu zen, gure kirola quadball izenera aldatu baino lehenago, eta quidditch izenak zekarren copyright demanda saihestu behar izan zuen. Early Acessetik atera ez zen joko honetan benetako jokalariekin jokatu zaitezke; Héctor Cabrera bera izan dezakezu zure taldean bilatzaile gisa adibidez.

Trihoop

Trihoop beste eskapada bat da Warner Brosen copyrightari ihes egiteko. Proiektu berri honetan quadball talde baten entrenatzaileaizango zara eta kontrako taldearen eraso eta defentsei aurre egiteko estrategia ezberdinak aukeratu beharko dituzu. Horretarako, defentsa eta erasorako formazio ezberdinak izango dituzu. Gai izango al zara eraso eta defentsa bakoitzaren indargune eta ahuluneak aurkitzeko?

Gainera, ez duzu zertan edozein talderekin jokatu. Euskal Selekzioaren entrenatzailearen lekua har dezakezu eta 2025eko Quadball Mundu Kopan Eskoziaren aurkako partidua berriro bizi ahalko duzu. Benetako partiduan, Euskadik 22.postua lortu zuen garaipen horrekin.